Sige lang

Sige lang...

itulak mo pa ako palayo sayo

Sige lang...

sanayin mo pa ako lalo

Sige lang...

ituloy mo lang ang pambabalewala sa akin

sige lang…

saktan mo pa ako nang saktan, sinasadya mo man o hindi

At sige lang,

Itutuloy ko lang din ang pagluha ko nang dahil sa'yo

Itutuloy ko lang ang pagiging manhid at tanga,

Patuloy na nagmamahal sa'yo at

Ipagpapatuloy ang masaktan.

Dahil nananalig ako

Na Darating din ang araw...

Na mapapagod na ako,

Na titigil na ako,

Na mawawala na rin lahat ng nararamdaman ko para sa'yo.

Kasabay nang paglipas ng panahon,

lilipas din ang lahat ng sakit

kasabay nang pagkawala ng pag-ibig ko para sa'yo.

Baka nga hindi talaga ako ang prayoridad mo.

Baka nga kulang pa talaga

O sadyang hindi lang ako makuntento

Sa kung anumang kapiranggot na kaya mong ibigay

At pakahulugan mo sa sinasabi mong mahal mo ako.

Sige lang, mawawala rin nang tuluyan ang lahat.

Wala namang permanente sa mundo,

Ang lahat ay nagbabago.

Kagaya mo

At malamang sa susunod

Ay kagaya ko na.

Baka lang din kasi

Na hindi naman talaga tayo ang itinadhana.

Nagkakilala lang, nagsama, nagsawa, nakalaan pala sa iba.

Lalayo na lang ako

Dahil ito naman yata ang gusto mo.

Ang lumamig at manlabo at tuluyan nang maglaho.

Ihahalik na lamang sa hangin

Lahat ng masasayang alaala,

Pakakawalan at lalaya na.

Sige lang,

Magiging ayos lang ako

At aalis na ng tuluyan dahil baka

Ito naman talaga ang gusto mo.

Sige Mahal,

Paalam na…