Dama Kita

Mornight Thoughts

12/22/2016

Written by: CieloAmethyst

Gusto kitang kausapin, kumustahin, maka-kwentuhan.

Pakiramdam ko kasi may pinagdadaanan ka.

Pero may karapatan pa ba akong damayan ka at ibahagi mo sa akin ang bigat ng kalooban na iyong nadarama?

Sino ba ako? Isa na lamang akong hamak na bahagi ng iyong kahapon, hindi ba?

Pero bakit hindi natin gawing ngayon at bukas ang nakaraan?

Baka pwede naman tayong maging magkaibigan?

Sa totoo lang, madalas kong maalala ang ating mga puyatan, kwentuhan, dramahan at tawanan.

May kwenta man o wala ang pinaguusapan natin ay masaya naman.

Pero pwede pa bang ibalik ang mga iyon?

Gayong tinuldukan na natin ang lahat ng nasa ating pagitan?

Kumusta ka na? Ayos ka lang ba?

Mukha kasing hindi.

Pero anuman yang pinagdaraanan mo, alam kong kakayanin mo.

Malakas ka at kaagapay mo Siya.

Minsan kitang naging sandigan noon at nakatitiyak ako na malalampasan mo rin iyan.

Tandaan mo lang na huwag mo masyadong tambayan iyan at umalis ka kaagad. 

Alam mo naman na kaligayahan mo ang lagi kong hangad.

Sana sa pamamagitan ng sulating ito 

Ay makarating sa'yo na nandito lang ako.

Handa akong makinig kung may sasabihin ka.

At handa rin akong maging kaibigan mo ha.

Wala man akong lakas ng loob na lapitan ka 

Para tanungin kung ano ba ang 'yong problema

Dadamayan kita kung kinakailangan mo ng kausap

At magsisilbi akong mahusay na tagapakinig sa iyong harap.

Iyon lang naman ang nais kong iparating.

Sana ang mensaheng ito ay dalhin sa'yo ng hangin.

Maging ayos ka lang sana palagi at maligaya

Ay ayos na rin ako at napatawad na rin naman kita. 

Kaibigan...

~Cie, 122216, 0330am