Kailan Nga Ba?

Dear Future Love, Kailan Ka Ba Darating?

Isinulat ni CieloAmethyst

Dec. 21, 2016

Hindi naman sa naiinip na ako. Hindi rin naman sa nawawalan na ako ng pag-asa. Gusto ko lang talaga magtanong kung kailan nga ba ang tamang panahon para sa ating dalawa.

Naniniwala ako na makikilala rin kita para makasama habambuhay iyon nga lang ay hindi ko alam kung kailan ang eksaktong petsa kung kailan mangyayari iyon.

Maaaring kilala na kita ngayon pero hindi ko pa alam o hindi pa natin alam dalawa na tayo na pala ang tunay na nakatadhana para sa isa’t isa. Gayunpaman, masaya pa rin ako na hindi pa natin alam ang bagay na iyon dahil sa ngayon ay marami pa akong oras at pagkakataon para mahalin ang sarili ko, gawin ang mga bagay na gustong-gusto kong gawin at mapuntahan ang mga lugar na gustong-gusto kong puntahan. Hindi pa man tayo magkasama ngayon, kapag dumating na ang ang araw na pinakahihintay natin pareho ay marami akong ikikwento sa’yo.  

Nanaisin kong gawin ulit ang mga bagay na gustong-gusto kong gawin kasama ka, at puntahan muli ang mga lugar na nais kong puntahan nang kapiling ka.

At magiging ganun din naman ako sa’yo. Sasamahan kita at sasakyan ang mga trip mo sa buhay.

Nasasabik na akong makilala ka. Gusto na kitang makausap, makakwentuhan, mayakap, mahalikan, lumakad patungo sa altar nang magkasama, tumira sa iisang bahay, bumuo ng pamilya at tumupad ng mga pangarap nating dalawa.

Konting tiyaga lang, Mahal. Malapit na iyon.

Habang hinihintay kita ngayon, marahil ay nag-iisip ka rin sa kawalan at hinihintay mo rin ang pagdating ko sa buhay mo. 

Kapit lang, Mahal. Malapit na iyon.

Cie~