Ang Hugot sa Ramen
August 23, 2016
Dear Future Love,
Heto na naman ako at mag-isang lumalafang sa isang restaurant kung saan nagbebenta sila ng ramen.
Nadagdagan na naman ang utang mo sa akin. Ito ang mga utang na pagkakataon na dapat ay magkasama tayo at kumakain sa pandalawahang mesa ngunit sa hindi kagandahang palad ay mag-isa lang ako.
Nadagdagan na naman ang mga malulungkot na resibo.
Nasaan ka na ba kasi? Bakit ba ang tagal mong dumating?
Ang lamig na ng noodles na kinakain ko pero wala ka pa rin.
Naunahan ka pang dumating ng mga kasamahan ng katapat kong mesa na na-traffic lang daw sa Cubao.
Ano na ang plano mo? Matagal ka pa rin ba? Hindi naman sa naiinip na ako. Medyo lang. At medyo nagtatanong lang.
Maanghang ang kinakain ko. Kasing anghang ng pagmamahal na maaari kong ibuhos sa sobrang init ng pag-ibig na kaya kong ialay sa'yo. Hinding- hindi mo ito makakalimutan at maiisipan na pakawalan dahil sa sobrang sarap na maaari mong madama.
Masaya naman ako kapag kumakain sa mga restawran na gusto ko dahil nabibigyan ko ng pagkakataon ang sarili ko na makaranas ng konting ginhawa paminsan-minsan. Pero baka lang kasi mas magiging masaya ang buhay kung magkasama tayo.
At kapag nangyari yon, marami akong ikukwento sa'yo. Promise!
Itaga mo pa sa lahat ng resibo ko.
Hintay lang talaga, Future love. Darating din ang tamang panahon nating dalawa.
CieloAmethyst ❤️
No comments:
Post a Comment