Kanseladong Tadhana

Ni CieloAmethyst
Feb.23,2016

Lubos na umasa at matinding naniwala
Na ikaw na nga ang sa aki'y itinadhana
Ngunit nagkamali yata ng sapantaha
Sapagkat ikaw ngayon ay naglaho na.

Wala na nga ang naging masayang samahan
Napalitan ng masakit sa taingang katahimikan
Ang pagsuyo mo sa bawat araw na dumadaan
Ay hindi na naulit kahit pa kailan man.

Mga pangako ay tuluyan nang napako
Na hindi ka magbabago at hindi ka lalayo.
Nasaan na ang ubod ng ligayang Tayo?
Wala na nga ba talaga ito kasabay ng pagkawala mo?

Mukhang nagkamali na naman ako ng akala
Na ikaw na nga ang ibinigay ni Bathala
Para sana makapiling sa lungkot at saya,
Walang iwanan sa galak o pagdurusa.

Kung talagang hindi tayo ang itinadhana
Maaari bang hilingin ang pagkansela?
Mula sana mismo sa iyong sariling pagwiwika
Na hindi pala tayo ang nakatakda para sa isa't isa, na wakas na at paalam na.